Энэтхэгээс 219 хүүхдийг авчрахаар боллоо


2020-06-01 11:26:10

Хөдөлмөр нийгмийн хамгааллын сайд С.Чинзориг "Энхрий хөөрхөн хүүхдүүд, эрхэм хүндэт эцэг эхчүүд, элэг нэгт монголчууд та бүхэндээ Олон улсын хүүхдийн эрхийг хамгаалах өдөр 6-р сарын 1-ний мэндийг Монгол Улсын Засгийн газрын нэрийн өмнөөс болон хувиасаа өргөн дэвшүүлье" хэмээгээд Засгийн газрын ээлжит бус хуралдааны талаар мэдээллээ.

Тэрбээр "Хүүхдийн эрхийг хамгаалах өдөр Засгийн газар ээлжит бусаар хуралдаж хүүхдийн асуудлаар хоёр чухал тогтоол гаргахаар боллоо.

Дэлхий нийт хамарсан ковид-19 цар тахлын үед эх орондоо амьдарч байгаа хүүхдийн эрхийг хамгаалах, урьдчилан сэргийлэх ажлыг нэлээдгүй хийж байгаагийн зэрэгцээ хилийн гадна амьдарч буй хүүхдийг эрсдэлээс хамгаалах, урьдчилан сэргийлэх, эх орондоо авчрах хэрэгцээ шаардлага тулгамдаж буй юм.

Бид НҮБ-ын Хүүхдийн сангаар дамжуулан Энэтхэг дэх НҮБ-ын Хүүхдийн сантай хамтран ажиллах талаар ярилцаж, Энэтхэгт суугаа Элчин сайдын яам, Гоман дацангийн төлөөлөгч болон хүүхдүүдийн ээжүүдээс нөхцөл байдлын талаар мэдээлэл авч байгаа. Хүүхдүүдийн амьдарч буй хийдээс 6 км зайтай орших Төвдийн тосгонд Ковид-19 вирусын 2 тохиолдол илэрсэн нь хүүхдүүд олноороо нэг дор байгаа нөхцөл байдлыг улам эрсдэлтэй болгож байгаа юм.

Тиймээс энэ удаагийн хуралдаанд Энэтхэг улс дахь Брайбүн Гоман дацанд сурч буй 10-18 насны 357 хүүхдийн хүсэлт гаргасан 219-ийг эх оронд нь авчрах тусгай үүргийн онгоц илгээхээр боллоо. Ирсний дараа тусгаарлах, эрүүл мэнд, нийгэм сэтгэл зүйн үйлчилгээ үзүүлэхтэй холбоотой асуудлыг шийдвэрлүүлэхээр тогтоолын төсөл боловсруулан оруулсан юм.

Засгийн газар тогтоолын төслийг дэмжиж хүүхдүүдийг авчрах болон ирсний дараа тусгаарлах болон нийгэм, сэтгэл зүйн үйлчилгээ үзүүлэх зардлыг Хүүхэд хамгааллын зардлаас гаргахаар шийдвэрлэлээ.

Брайбүн Гоман дацангийн хүүхдүүдийн 70-аад хувь нь Баянхонгор, Архангай, Завхан, Төв, Хэнтий, Увс аймгийн харьяалалтай, малчин өрхийн хүүхдүүд юм.

Мөн энэ удаагийн хуралдаанаар Олон улсын хүүхдийн "Найрамдал-2" зусланг Хөвсгөл далайн байгалийн цогцолбор газарт байгуулахаар боллоо" гэжээ.

 

АНХААРУУЛГА: Уншигчдын бичсэн сэтгэгдэлд Buzznews.mn хариуцлага хүлээхгүй болно. Buzznews.mn сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Сэтгэгдэл бичих:




Дээрхи үсгүүдийг бичнэ үү